Kapiteni i Liverpool, Virgil van Dijk, ka pranuar se sezoni i skuadrës ka qenë “i papranueshëm”, pas humbjes 3-2 ndaj Manchester United në “Old Trafford”.
Mbrojtësi holandez nuk kërkoi justifikime dhe theksoi se Liverpool duhet të reagojë menjëherë për të mos përsëritur të njëjtat gabime sezonin e ardhshëm.
“Nuk jam këtu për të gjetur justifikime. Ka qenë një sezon shumë zhgënjyes, një sezon i papranueshëm. Nuk duhet të na vijë keq për veten. Duhet të punojmë dhe ta ndryshojmë këtë situatë. Ky nuk është Liverpool”, u shpreh Van Dijk.
Liverpool ka pësuar tashmë 18 humbje në të gjitha garat, ndërsa në Premier League kjo ishte humbja e 11-të në mbrojtjen e titullit kampion. Skuadra e Arne Slot ndodhet në vendin e katërt dhe mund të ketë ende nevojë për katër pikë në tri ndeshjet e fundit për të siguruar kualifikimin në Champions League.
Van Dijk theksoi se ka shumë punë për t’u bërë “prapa skenave”, sidomos për të rikthyer stabilitetin dhe mentalitetin fitues të klubit.
“Kam shumë kujdes për këtë klub. Do të jem gjithmonë këtu, në ditë të mira dhe më pak të mira. Por duhet të sigurohemi që të jemi në Champions League, sepse kjo ka rëndësi për klubin edhe financiarisht, por edhe sepse duam të luajmë kundër skuadrave më të mira në Europë”, tha ai.
Kapiteni foli edhe për kritikat në rrjetet sociale, ku disa tifozë kanë sugjeruar se skuadra ka pasur shumë ditë pushimi. Van Dijk i mbrojti lojtarët, duke thënë se secili ka të drejtë të vendosë çfarë bën në ditën e lirë.
“Nuk jemi fëmijë. Të gjithë janë të rritur. Nëse ke një ditë pushim, secili vendos vetë çfarë të bëjë me familjen”, deklaroi mbrojtësi.
Në fund, Van Dijk dha një mesazh të qartë për sezonin e ardhshëm: Liverpool nuk mund ta lejojë veten të përsërisë këtë situatë.
“Duhet ta kuptojmë se sezoni i ardhshëm nuk mund të jetë si ky. Është e papranueshme”, përfundoi ai.
