Rreth 2.8 miliardë njerëz në mbarë botën nuk kanë qasje në strehim të përshtatshëm dhe të sigurt, sipas raportit vjetor të UN-Habitat për vitin 2024.
Ndër ta, 1.1 miliardë jetojnë në lagje të varfra, ku mungojnë kushtet minimale të jetesës si uji i pijshëm dhe kanalizimet. Pjesa më e madhe e këtyre komuniteteve ndodhet në Afrikë dhe Azi, të cilat përballen me një mungesë të theksuar prej 170 milionë shtëpish. Sipas drejtoreshës ekzekutive të UN-Habitat, Anaclaudia Rosbas, ndryshimet klimatike, konfliktet dhe fatkeqësitë natyrore po detyrojnë miliona njerëz të braktisin shtëpitë e tyre.
Të dhënat tregojnë se 318 milionë persona janë të pastrehë, çka pasqyron përmasat alarmante të krizës globale të strehimit. Një në katër njerëz në botë jeton në kushte që rrezikojnë shëndetin dhe sigurinë e tyre. Për më tepër, 14% e banorëve të zonave urbane dhe 40% të atyre rurale nuk kanë akses në ujë të pijshëm, ndërsa dy në pesë persona nuk kanë shërbime bazë sanitare.
UN-Habitat nënvizon rëndësinë e reformimit të politikave të planifikimit urban dhe sistemeve të financimit për të përmirësuar kushtet e jetesës. Sipas raportit, deri në vitin 2040 rreth dy miliardë banorë të qyteteve do të përballen me rritje të ndjeshme të temperaturave, gjë që pritet të rëndojë edhe më shumë situatën.
Të gjitha shtetet anëtare të UN-Habitat miratuan planin strategjik 2026–2029, i cili synon zgjerimin e aksesit në strehim, tokë dhe shërbime bazë.
