Tre persona janë arrestuar dhe një tjetër është shpallur në kërkim këtë të shtunë, pas dy konflikteve të ndodhura për motive të dobëta në Kamëz dhe në zonën e Kombinatit në Tiranë.
Në Zall-Herr, në pranga ranë dy të rinj, 20 dhe 21 vjeç, të dyshuar se kanë goditur me grushte dy persona gjatë një sherri, ndërsa vijon puna për identifikimin e personave të tjerë të përfshirë.
Ndërkohë, në Kombinat u vu në pranga një 37-vjeçar, i dyshuar se dhunoi fizikisht dy shtetas, ndërsa një 33-vjeçar është shpallur në kërkim si i përfshirë në konflikt.
“Specialistët për Hetimin e Krimeve të Komisariatit të Policisë Nr. 5 arrestuan në flagrancë shtetasit A. T., 20 vjeç, dhe O. E., 21 vjeç, pasi dyshohet se, gjatë një konflikti për motive të dobëta, të ndodhur në fshatin Zall-Herr, kanë goditur me grushte 2 shtetas. Vijon puna për identifikimin dhe kapjen e personave të tjerë të përfshirë në këtë ngjarje”,njofton policia.
“Specialistët për Hetimin e Krimeve të Komisariatit të Policisë Nr. 6 arrestuan në flagrancë shtetasin O. Z., 37 vjeç, pasi dyshohet se, gjatë një konflikti për motive të dobëta, të ndodhur në rrugën “Thoma Goxha”, në zonën e Kombinatit, ka goditur fizikisht 2 shtetas, duke u shkaktuar dëmtime. Në lidhje me këtë ngjarje u shpall në kërkim edhe shtetasi K. L., 33 vjeç, i dyshuar si i përfshirë në konflikt. Punohet për kapjen e tij. Pamjet e këtij konflikti janë publikuar edhe në rrjetet sociale”, njofton policia.
