Të hënën, më 2 nëntor, do të zhvillohen homazhet në nderim të diplomatit, ish-deputetit dhe publicistit Bashkim Zeneli, i cili u nda nga jeta në moshën 78-vjeçare.
Ceremonia për nder të figurës së tij do të mbahet pranë Sallës së Seancave Plenare të Kuvendit të Shqipërisë, nga ora 11:00 deri në orën 13:00. Familjarë, miq, kolegë, përfaqësues të institucioneve dhe personalitete të jetës politike e publike do të kenë mundësinë t’i japin lamtumirën e fundit.
Pas përfundimit të homazheve, kortezhi mortor do të niset drejt varrezave të Sharrës, ku Bashkim Zeneli do të përcillet për në banesën e fundit.
Bashkim Zeneli ishte një nga figurat e njohura të diplomacisë, politikës dhe publicistikës shqiptare, me një karrierë shumëvjeçare në shërbim të institucioneve dhe përfaqësimit të vendit.
I diplomuar në Drejtësi, ai e nisi karrierën si përkthyes i gjuhës gjermane, për t’u angazhuar më pas në gazetari dhe në analizën e politikës së jashtme.
Pas vitit 1991, Zeneli u përfshi në jetën politike, duke shërbyer si sekretar për marrëdhëniet me jashtë në Partinë Socialiste. Ai u zgjodh deputet i Kuvendit të Shqipërisë për dy legjislatura dhe mbajti gjithashtu detyrën e nënkryetarit të Komisionit Parlamentar për Politikën e Jashtme.
Një pjesë e rëndësishme e karrierës së tij ishte shërbimi diplomatik. Zeneli përfaqësoi Shqipërinë si ambasador në Gjermani gjatë viteve 1998–2002 dhe në Greqi nga viti 2002 deri më 2005.
Gjatë misionit në Gjermani, ai u angazhua për forcimin e marrëdhënieve mes dy vendeve dhe për çështjen e Kosovës. Ndërsa në Greqi, kontributi i tij u përqendrua në zhvillimin e marrëdhënieve dypalëshe dhe mbështetjen e komunitetit shqiptar.
Për kontributin e tij ndër vite, Zeneli u vlerësua me disa çmime dhe dekorata. Në vitin 2018, presidenti i atëhershëm Ilir Meta i akordoi titullin “Mjeshtër i Madh”. Ai u vlerësua gjithashtu në Gjermani për kontributin diplomatik, u shpall “Qytetar Nderi” i Athinës dhe u nderua me medaljen e artë “Zgalemi i Lirisë”.
Përvoja dhe njohuritë e tij mbi marrëdhëniet shqiptaro-greke u pasqyruan edhe në librin “Miqësi e trazuar”, ku trajtoi zhvillimet dhe sfidat e marrëdhënieve mes dy vendeve.
Me kontributin në gazetari, politikë, parlament dhe diplomaci, Bashkim Zeneli lë pas një trashëgimi të rëndësishme në jetën publike dhe në përfaqësimin ndërkombëtar të Shqipërisë.
