Një ngjarje e rëndë kriminale është parandaluar në zonën e Malit të Robit në Golem, pasi një 47-vjeçar u kap i armatosur teksa dyshohet se ishte nisur për të vrarë personat që kishin dhunuar nipin e tij.
Policia njofton se në pranga ka rënë shtetasi M. N., banues në Kavajë. Ai u ndalua pranë hotelit ku kishte ndodhur konflikti, ndërsa gjatë kontrollit të automjetit të tij u gjet një armë zjarri automatik, kallashnikov, 3 karikatorë dhe 84 fishekë luftarakë.
Ngjarja nisi pas një konflikti në një hotel në zonën e Malit të Robit. Sipas hetimeve paraprake, F. H., 28 vjeç, A. F., 36 vjeç, E. D., 20 vjeç dhe M. M., 36 vjeç, dyshohet se kanë dhunuar 18-vjeçarin G. N., i cili punonte si kamerier në lokalin e hotelit.
Shkak i konfliktit dyshohet se ka qenë mosdhënia e pagesës për punën e kryer. 18-vjeçari ka marrë ndihmë mjekësore në Spitalin e Kavajës.
Teksa policia po kryente veprimet në vendngjarje, ka marrë informacion në rrugë operative se xhaxhai i 18-vjeçarit, M. N., ishte armatosur dhe po shkonte drejt hotelit me qëllim hakmarrjeje ndaj personave që kishin dhunuar nipin.
Ndërhyrja e menjëhershme e policisë bëri të mundur ndalimin e tij dhe parandalimin e një përshkallëzimi të mëtejshëm.
Nga hetimet rezultoi gjithashtu se pas konfliktit, vendngjarja ishte pastruar, ndërsa DVR-ja e kamerave të sigurisë ishte hequr dhe kabllot ishin prerë.
Për dhunën ndaj 18-vjeçarit u arrestuan në flagrancë F. H. dhe E. D., ndërsa A. F. u shpall në kërkim. M. M. po procedohet në gjendje të lirë.
Ndërkohë, 47-vjeçari M. N. u arrestua për armëmbajtje pa leje dhe veprimet e tjera të dyshuara.
Materialet procedurale i janë referuar Prokurorisë, ndërsa vijon puna për dokumentimin e plotë të ngjarjes.
