Si rezultat i bashkëpunimit ndërmjet Interpol Tiranës dhe homologëve në Turqi, pritet që ditën e sotme, të ekstradohet në Shqipëri, shtetasi i shumëkërkuar Dritan Rexhepi alias Gramos Rexhepi.
Dritan Rexhepi do të ekstradohet në nga Turqia për tu përballur me akuzat e ngritura në Shqipëri.
Rexhepi po gjykohet për rrëmbimin dhe zhdukjen e Jan Prengës. Sipas SPAK ai është personi që ka dhënë urdhrin për rrëmbimin dhe zhdukjen e Jan Prengës.
Ndër të tjera, Rexhepi është dënuar me 25 vjet burg nga Gjykata për vrasjen e efektivit Durim Kasmit, ngjarje e ndodhur në vitin 1998. Edhe Italia e ka dënuar në mungesë Rexhepin me 20 vite burg për trafik ndërkombëtar droge.
Por kush është Dritan Rexhepi?
Shqiptari i cili ishte edhe një nga drejtuesit kryesor të kartelit shqiptar të kokainës të njohur me emrin ‘Kompania Bello’ u kap në një vilë luksoze në Turqi, pasi shërbimet italiane të sigurisë sinjalizuan homologët turq për mbërritjen e Rexhepit në Stamboll.
Dritan Rexhepi ishte futur në Turqi me një pasaportë të falsifikuar kolumbiane me emrin Benjamin Omar Perez Garcia. Gjatë operacionit atij iu gjetën një pistoletë, një sasi parash si dhe disa sende personale me vlerë.
Rexhepi ishte shpallur në kërkim ndërkombëtar për trafik droge në gjysmën e Europës. Ai vepronte si ndërmjetës dhe organizator në emër të dy grupeve kriminale shqiptare, duke patur akses në sasi të pafundme kokaine.
Por Dritan Rexhepi është në kërkim edhe nga autoritetet shqiptare, si porositës i rrëmbimit dhe zhdukjes së Jan Prengës. Kjo, pasi vëllai i Janit, Astrit Prenga, kishte vjedhur një sasi kokaine në Britaninë e Madhe që i përkiste Rexhepit dhe nuk kishte kthyer as shumat e parave.
Jan Prenga u rrëmbye në Kamëz më 17 Janar 2020.
Dritan Rexhepi ka një të shkruar të pasur kriminale. Ai është akuzuar për vrasjen e dy policëve në vitin 1998. Më pas, ai është arratisur dy herë duke u larguar nga Shqipëria e duke u bërë një ndër bosët e trafikut të kokainës.
