Ka vijuar në kryeqytet turneu ndërkombëtar i mundjes “Ranking Series Muhamet Malo”, një event ku marrin pjesë mbi 700 mundës nga e gjithë bota, që po dhurojnë emocione në tapet. Një turne që mban emrin e një prej personaliteteve të këtij sporti, ish-kampion e ish-president i mundjes shqiptare.
Pas medaljes së artë te Chermen Valiev në ditën e parë, në dy ditët e tjera rezultatet e mundësve kuqezinj nuk kanë qenë shumë të mira. Kështu, sot, në ditën e tretë, u zhvilluan duelet e tjera në stilin greko-romak e rezultatet e mundësve shqiptarë ishin sporadike.
Në peshën 67kg, mundësi Gjete Prenga e nis mirë konkurrimin, duke mundur 6-3 kinezin Dongfu Xie në kualifikuese. Më pas, ai u mund 9-0 nga bullgari Abu Muslim Amaev. Po në këtë peshë garoi edhe Ardit Zeneli, që u mund 11-2 nga rusi Madiyar Maulitkanov.
Të dielën, në ditën e fundit të turneut, në tapet do të garojnë për Shqipërinë edhe Bajram Sina e Andi Muca në peshën 55kg si dhe Ergi Uku në peshën 60kg. Në peshën 72 kg do të konkurrojnë Xhorxh Frrokaj e Emiljano Tafa, ndërsa Kelsi Nelaj e Boris Frrokaj do të garojnë në 82kg.
