Presidenti Donald Trump ka deklaruar se SHBA-ja ka “kontrollin absolut” mbi Ngushticën e Hormuzit, ndërsa Irani dhe Omani vijojnë negociatat për rikthimin e lundrimit në këtë rrugë strategjike detare. Trump paralajmëroi se SHBA-ja do të përgjigjej ashpër nëse Irani do të sfidonte Uashingtonin.
“Tani për tani ne kemi kontroll të plotë të Ngushticës së Hormuzit. Ata nuk e kanë kontrollin, ne e zotërojmë atë”, u shpreh presidenti amerikan para gazetarëve.
Ai shtoi se nëse Irani përpiqet të sfidojë SHBA-në do ta shkatërrojmë
“Ne do ta shkatërrojmë atë, unë nuk u besoj atyre”, tha Trump.
Ndërkohë, trafiku detar në ngushticë ka rënë ndjeshëm. Sipas të dhënave të Kpler, të martën u regjistruan vetëm 8 kalime anijesh, shumë më pak se mesatarja prej rreth 130-140 anijesh në ditë para mbylljes së rrugës detare.
Në anën tjetër, Pakistani thotë se SHBA-ja dhe Irani mund të jenë pranë një marrëveshjeje, ndërsa negociatat e ndërmjetësuara nga Omani për rikthimin e pjesshëm të trafikut thuhet se kanë hyrë në një fazë të avancuar.
