Presidenti amerikan Donald Trump po shqyrton mundësinë e një vizite në Izrael gjatë muajit shtator, në varësi të ecurisë së negociatave me Hamasin për një armëpushim dhe lirimin e pengjeve. Lajmi raportohet nga portali izraelit Ynet, i cili citon burime zyrtare amerikane dhe izraelite.
“Presidenti do të vizitojë Britaninë në shtator dhe është e mundur që të ndalet edhe në Izrael, por ende nuk është asgjë e sigurt apo e finalizuar,” tha një zyrtar amerikan për Ynet.
Sipas raportit, mundësia për një vizitë varet nga zhvillimet në bisedimet për armëpushim dhe përfundimin e luftës në Gaza.
“Trump do të dëshironte të vinte në Izrael nëse negociatat do të kenë sukses,” shton raporti.
Një zyrtar izraelit gjithashtu ka konfirmuar se ekziston një mundësi për këtë udhëtim.
“Ka zëra për një vizitë të mundshme të Trump,” tha ai për Ynet, por shtoi se “asgjë nuk është konkrete ende. Gjithçka mbetet në ajër.”
Trump pritet të vizitojë Mbretërinë e Bashkuar nga data 17 deri më 19 shtator, me ftesë të mbretit Charles.
Ndërkohë, ndërmjetësuesit ndërkombëtarë po punojnë intensivisht ditët e fundit për të ringjallur shpresat për një armëpushim në Gaza, pas një raundi të dështuar bisedimesh muajin e kaluar.
