Presidenti i SHBA-së, Donald Trump, ka shprehur përkrahje për marrëveshjen e arritur nga kryeministri britanik Keir Starmer për Ishujt Chagos. Ai e ka cilësuar këtë marrëveshje si “më të mirën që mund të bënte”, pavarësisht kritikave të tij të mëparshme. Në një postim në rrjetin Truth Social, Trump ka nënvizuar se ka patur “diskutime shumë produktive” me Starmer për Diego Garcian, ishullin ku ndodhet një bazë ushtarake strategjike amerikane në Oqeanin Indian, e cila është kritike për sigurinë kombëtare të SHBA-së. Ai gjithashtu ka paralajmëruar se Uashingtoni rezervon të drejtën të përforcojë praninë ushtarake në rast se marrëveshja e qirasë dështon ose shkel interesat amerikane.
Marrëveshja përfshin disa pika të rëndësishme. Së pari, Mbretëria e Bashkuar do t’i dorëzojë sovranitetin e ishujve Mauritiusit, një proces që pasqyron një vendim gjyqësor që ka detyruar Londrën të heqë dorë nga kontrolli mbi këto territore. Baza ushtarake e Diego Garcia do t’i jepet me qira SHBA-së për një periudhë 99 vjeçare, dhe fuqive të treta do t’u ndalohet përdorimi i ishujve përreth pa marrëveshje të veçantë.
Kjo marrëveshje gjithashtu lejon Mauritiusin të organizojë kthimin e çagosianëve, përveç zonës së Diego Garcias. Ajo mund të zgjatet edhe për 40 vite të tjera. Sipas parashikimeve, kostoja vjetore e marrëveshjes pritet të jetë rreth 101 milionë paund, me totalin që mund të arrijë deri në 30 miliardë paund. Megjithatë, marrëveshja duhet të ratifikohet nga parlamentet e Britanisë dhe të Mauritiusit për t’u bërë zyrtare.
Ishujt Chagos janë në qendër të një debati të gjatë ndërkombëtar dhe vazhdojnë të mbeten një nga pikat më strategjike ushtarake në botë, veçanërisht për SHBA-të, që i shohin ato si të rëndësishme për operacionet e tyre në Oqeanin Indian.
