Presidenti i SHBA-së, Donald Trump, ka bërë një deklaratë të re, duke paralajmëruar zhvillime të rëndësishme lidhur me Rusinë.
“Në Rusi po bëhet përparim i madh. Qëndroni në pritje,” shkroi Trump në një postim në rrjetin e tij social Truth Social, pa dhënë më shumë detaje.
Mesazhi i tij vjen menjëherë pas një samiti që ai zhvilloi në Alaskë me Presidentin rus, Vladimir Putin — dhe vetëm pak orë përpara takimit të planifikuar në Shtëpinë e Bardhë me Presidentin e Ukrainës, Volodymyr Zelensky, që pritet të zhvillohet nesër.
Më herët, i dërguari i posaçëm i SHBA-së për Ukrainën, Steve Witkoff, deklaroi se Trump dhe Putin kanë arritur një marrëveshje për ofrimin e “garancive të forta të sigurisë” për Ukrainën, si pjesë e një përpjekjeje më të gjerë për t’i dhënë fund luftës.
Në një intervistë për CNN, Witkoff bëri të ditur gjithashtu se Rusia ka bërë “disa lëshime” në tryezën e bisedimeve, duke iu referuar pesë rajoneve ukrainase nën pushtim rus.
“Sipas informacionit që kemi, rusët kanë bërë disa lëshime në tryezën e negociatave lidhur me të gjitha pesë këto rajone,” u shpreh Witkoff, duke iu referuar dukshëm rajoneve të Donetskut, Luhanskut, Khersonit, Zaporizhias dhe Krimesë.
Për momentin nuk ka konfirmim zyrtar nga pala ruse apo ukrainase lidhur me detajet e marrëveshjes së mundshme, ndërsa takimi i pritshëm mes Trump dhe Zelensky pritet të jetë vendimtar për ecurinë e mëtejshme të procesit diplomatik.
