José Mourinho ka komentuar fitoren dramatike të Real Madridit ndaj Romës, duke vlerësuar reagimin e skuadrës së tij pas një ndeshjeje që për pjesën më të madhe u zhvillua në favor të italianëve.
Real Madridi arriti të përmbyste rezultatin në minutat e fundit, ndërsa Mourinho e përshkroi reagimin e lojtarëve si një “rebelim të organizuar dhe emocional”.
“Kundërshtari ishte shumë i fortë. Ata luajnë një futboll ndryshe nga ai me të cilin jemi mësuar. Është shumë e vështirë ta mbash atë ritëm dhe atë intensitet për 90 minuta. Ata e meritonin avantazhin, edhe pse nuk më pëlqyen disa nga golat që pësuam”, deklaroi Mourinho.
Trajneri portugez theksoi se skuadra e tij nuk u dorëzua edhe kur situata dukej e komplikuar.
“Më pas e përmbysëm ndeshjen me shumë kurajë. Lojtarët treguan karakter. Në një moment kërkonim barazimin, që do të ishte një rezultat pozitiv, por në fund morëm një fitore shumë të rëndësishme.”
Mourinho nuk ishte plotësisht dakord me analizën e Federico Valverdes, i cili kishte deklaruar se Real Madridi nuk e interpretoi mirë ndeshjen në pjesën e parë.
“Nuk jam dakord me Feden. Ata na paraqitën një mënyrë loje ndryshe nga ajo që kishim analizuar. Na sulmuan me tre lojtarë në krahun e djathtë dhe kjo na krijoi probleme.”
Pas pushimit, stafi madrilen bëri ndryshimet e nevojshme, por Roma arriti të godiste sërish në kundërsulm.
“Më pas erdhi ai rebelim i organizuar dhe emocional, gjithmonë brenda një koncepti taktik që e njihja. Kam qenë shumë vite në Itali dhe e njoh Gasperinin. Ai na befasoi, por në futboll nuk ka mrekulli. Është e pamundur të luash 90 minuta me atë intensitet.”
Mourinho vlerësoi gjithashtu rëndësinë e rezultatit, duke theksuar se Real Madridi tashmë ka gjashtë pikë pas dy përballjeve shumë të vështira.
