Afrimi i festave të fundvitit kthen edhe aktivitetet në vend, veçanërisht në kryeqytet.
Bashkia e Tiranës ka ndezur sot (2 Dhjetor) dritat në “Sheshin Skënderbej”.
I pranishëm në shesh ishte edhe kryebashkiaku Erjon Veliaj.
I rrethuar nga qindra fëmijë dhe qytetarë, në një atmosferë festive, Veliaj i uroi të gjithë shqiptarët, teksa bëri thirrje që “me ndezjen e dritës së festave, secili të ndezë edhe dritën e zemrës”.
“Gëzuar festat! Sjellshin mbarësi dhe mirësi në të gjithë familjet tuaja. Ju dua shumë! Të rrojë Tirana dhe të rrojë e gjithë Shqipëria”, shtoi ndër të tjera kryebashkiaku.
Këtë vit në qendër të Tiranës, ndryshe nga herët e tjera, ishin katër pemë Krishtlindjesh.
Ceremonia pasoi më tej edhe me koncertin festiv nga fëmijët e pranishëm. Gjithashtu u lajmërua edhe për koncert për ‘Natën e Bardhë’ në Tiranë.
