Një 32-vjeçar në Florida është shpallur fajtor për grabitjen e bizhuterive luksoze në një dyqan Tiffany & Co. Pasi u ndalua nga policia, ai tentoi të fshihte vathët duke i gëlltitur, por skaneri zbuloi gjithçka.
Një grabitje e pazakontë ka përfunduar me një dënim të shpallur nga gjykata në Florida të SHBA-së. Jaythan Gilder u shpall fajtor për grabitje dhe vjedhje të rëndë, pasi mori dy palë vathë me diamante nga një dyqan luksoz dhe më pas tentoi t’i fshihte duke i gëlltitur.
Ngjarja ndodhi në shkurt të vitit 2025, në një dyqan Tiffany & Co. në një qendër tregtare në Orlando. Sipas prokurorisë, Gilder u paraqit si përfaqësues i një basketbollisti profesionist që dëshironte të blinte bizhuteri të shtrenjta. Kjo bëri që punonjësit ta shoqëronin në një ambient privat, ku iu treguan disa prej artikujve më të kushtueshëm.
Por, në vend që të kryente blerjen, ai mori dy palë vathë me diamante dhe u përpoq të largohej me forcë. Vlera e tyre arrinte në rreth 769.500 dollarë, ose afërsisht 570 mijë paund. Gjatë përplasjes, një punonjës i dyqanit mbeti i lënduar.
Policia arriti të identifikonte automjetin e tij përmes kamerave të sigurisë. Gilder u ndalua nga patrulla rrugore në një zonë tjetër të Floridës, ndërsa po udhëtonte larg Orlandos.
Skaneri zbuloi bizhuteritë në trupin e tij
Gjatë ndalimit, efektivët vunë re se ai po përpiqej të gëlltiste disa objekte. Pavarësisht përpjekjeve për ta ndaluar, ai arriti t’i gëlltiste. Fillimisht, policia nuk mundi t’i rikuperonte bizhuteritë, por një skaner i kryer në ambientet e paraburgimit zbuloi objektet brenda aparatit të tij tretës.
Gilder u dërgua në spital dhe u mbajt nën vëzhgim për gati dy javë, derisa vathët u nxorën nga trupi i tij. Bizhuteritë u pastruan dhe u ekzaminuan nga një specialist i Tiffany & Co., i cili konfirmoi se numrat e tyre të identifikimit përputheshin me ata të artikujve të vjedhur.
Përpjekja për të zhdukur provat nuk e ndihmoi të shmangte përgjegjësinë penale. Më 22 tetor 2026, juria e shpalli fajtor për grabitje dhe vjedhje të rëndë. Sipas raportimeve, seanca për caktimin e dënimit është planifikuar për 7 dhjetor.
Rasti tërhoqi vëmendje për mënyrën e pazakontë me të cilën autori tentoi të fshihte bizhuteritë, por edhe për rrezikun që iu shkaktua punonjësve gjatë grabitjes.
