Një murgeshë franceze 81-vjeçare, mikeshë e ngushtë e Papa Françeskut për më shumë se 40 vjet, preku publikun gjatë një momenti të rrallë në Bazilikën e Shën Pjetrit, ku u lejua të anashkalonte protokollin dhe të afrohej pranë arkivolit të Papës për t’i dhënë lamtumirën e fundit.
Miqësia që lindi në Buenos Aires
Genevieve Jeanningros, murgesha në fjalë, ka ndarë një lidhje të veçantë me Papa Françeskun që nga koha kur ai shërbente si kryepeshkop në Buenos Aires nën emrin Jorge Mario Bergoglio. Të dy i bashkoi përkushtimi i tyre për të ndihmuar ata që shoqëria shpesh i lë pas dore. Për më shumë se pesë dekada, Jeanningros ka punuar me gra të margjinalizuara, veçanërisht me komunitetin transgjinor në Ostia të Romës.
Një moment i paharruar: pranë arkivolit
Në një video që bëri xhiron e rrjeteve, murgesha shihet duke iu afruar arkivolit të Papës, e shoqëruar nga një zyrtar i Vatikanit. Ndërkohë që protokolli i rreptë lejon vetëm klerikët të qëndrojnë në atë zonë, askush nuk ndërhyri. Ajo qëndroi për disa çaste në heshtje, me një shami blu mbi kokë, dhe shpërtheu në lot, një skenë që emocionoi shumë vetë.
Papa e quante me përkëdheli “L’enfant terrible” (fëmija i tmerrshëm), një pseudonim që fliste për shpirtin e saj rebel, por të përkushtuar.
Një lidhje që zgjati deri në fund
Në korrik të vitit të kaluar, Papa Françesku e vizitoi personalisht murgeshën në Ostia, për ta nderuar për punën e saj humanitare. Takimi u zhvillua në një qendër komunitare, ku ai vlerësoi publikisht përkushtimin e saj ndaj më të pambrojturve.
Jeanningros jeton në një karvan së bashku me murgeshën tjetër, Anna Amelia Giaketto. Çdo të mërkurë, ajo sillte në Vatikan gra të pastreha, të varfra apo transgjinore, të cilat Papa i mirëpriste me ushqim, ngrohtësi dhe ndihmë financiare.
Prania e saj pranë arkivolit të Papës u përjetua si një moment simbolik, një përshëndetje e fundit mes dy miqve të vjetër, të lidhur përtej kohës dhe rregullave.
