Një tërmet me magnitudë 5.7 të shkallës Rihter goditi mëngjesin e sotëm ishullin e Kreta, duke shkaktuar shqetësim te banorët, por pa raportime për dëme deri tani.
Sipas të dhënave nga Instituti Gjeodinamik, lëkundja sizmike ndodhi në orën 06:18 dhe kishte epiqendrën në zonën detare, rreth 23 kilometra në jug-jugperëndim të Goudouras, në rajonin e Lassithi, me një thellësi prej 9.7 kilometrash. Tërmeti u ndje pothuajse në të gjithë ishullin.
Autoritetet lokale bëjnë të ditur se, ndonëse lëkundja ishte e fortë dhe zgjati disa sekonda, nuk janë evidentuar dëme materiale. Kryetari i bashkisë së Sitia, Giorgos Zervakis, theksoi se tërmeti shkaktoi shqetësim te qytetarët, ndërsa paslëkundjet vijojnë të ndihen.
Edhe kryetari i bashkisë së Ierapetra, Manolis Fragoulis, u bëri thirrje banorëve të ruajnë qetësinë, duke nënvizuar se situata po monitorohet vazhdimisht nga institucionet përkatëse.
Nga ana tjetër, nënkryetari i qarkut të Lassithit, Yiannis Androulakis, deklaroi për ERT se tërmeti u ndje në të gjithë pjesën lindore të ishullit, nga Sitia deri në Heraklion. Ai shtoi se mbrojtja civile është vendosur në gatishmëri, ndërsa pritet të vlerësohen pasojat e mundshme, veçanërisht në zonat me ndërtesa më të vjetra.
Pas goditjes kryesore, në të njëjtën zonë janë regjistruar edhe të paktën pesë paslëkundje me magnitudë nga 3.5 deri në 3.8, duke mbajtur në alarm autoritetet dhe banorët.
