Reshjet e dendura të shiut të shoqëruara me erëra të forta vijojnë të jenë prezentë në Lezhë, duke krijuar probleme e “lënë në terr” shumë qytetarë.
Burime për mediat bëjnë me dije se sipas të dhënave pa energji elektrije janë disa fshatra në zonën e Zadrimës, Ishull-Lezha dhe pjesa e Bregut të Matës.
Në terren kanë “zbarkuar” grupet e punës të Operatorit të Shpërndarjes së Energjisë Elektrike të cilët po punojnë për riparimin e defekteve dhe rikthimin e energjisë në zonat ku mungon.
Ndërkohë, moti i keq dhe era e fortë ka vështirësuar punën e tyre. Sakaq, edhe lundrimi detar në Shëngjin vijon të jetë i pezulluar, pasi dallgëzimi ka arritur deri ne 7-8 ballë me shpejtësi ere deri 15-20m/s dhe lartësi dallge nga 1.50 deri 2.00 metra.
Po ashtu ka rritje te nivelit të prurjeve në lumin Drin, Mat dhe Gjader, por deri më tani situata raportohet stabël dhe nuk përbëjnë rrezik për dalje nga shtrati.
Situata po vijon të mbahet në kontroll të vazhdueshëm nga Mbrojtja Civile në të tre Bashkitë e qarkut Lezhë.
