Të paktën 49 persona kanë humbur jetën në Afrikën e Jugut, si pasojë e shirave të rrëmbyeshëm që shkaktuan përmbytje të mëdha në provincën e Kepit Lindor.
Rajoni kryesisht rural, që shtrihet nga brigjet e Oqeanit Indian deri në malet e brendshme është përfshirë nga stuhi të fuqishme dhe reshje të dendura bore që nga fundjava.
Gjatë ditëve të fundit, një pjesë e madhe e territorit të Afrikës së Jugut është përballur me mot ekstrem, ku reshjet e rrëmbyeshme të shiut dhe temperaturat e ulëta kanë shkaktuar dëme të mëdha.
“Nuk kemi parë kurrë këtë lloj kombinimi të borës dhe shirave të rrëmbyeshëm në dimër njëkohësisht”, u tha gazetarëve kryeministri i Kepit Lindor, Lubabalo, Oscar Mabuyane.
Ndër viktimat janë edhe katër fëmijë, të cilët humbën jetën pasi minibusi që i transportonte për në shkollë u mor nga ujërat.
“Mjerisht, katër nga këta nxënës janë konfirmuar të vdekur, së bashku me shoferin dhe drejtuesin e minibusit-taksisë”, tha Mabuyane. “Katër nxënës janë ende të zhdukur dhe janë ende në kërkim”, vazhdoi ai, duke shtuar se tre të tjerë ishin gjetur gjallë.
Zyrtarët nuk dhanë informacione shtesë rreth viktimave të tjera, duke thënë se situata po evoluon.
