Sot, Kuvendi i Shqipërisë do të kalojë për votim nen për nen projekt-buxhetin e vitit 2025, i cili parashikon mbledhjen e 7.5 miliardë eurove në arkën e shtetit.
Kjo seancë pritet të jetë sa e rëndësishme dhe e zhurmshme, ndërkohë që Partia Demokratike (PD) do të propozojë një seri amendamentesh, përfshirë kërkesën për vendosjen e një minimumi jetik prej 200 euro.
Në këtë seancë, pas 11 muajsh izolim do të rikthehet në Kuvend edhe kryetari i PD-së, Sali Berisha, i cili u lirua nga “arresti shtëpiak”.
Një nga ndryshimet më të dukshme për Berishën në Kuvend do të jetë pozita e Lulzim Bashës, i cili deri në shtator ka qenë i vendosur afër Berishës në sallë, ndërsa tani do të jetë dy rreshta pas tij.
Krahu i Berishës do të mbushet nga deputetët Albana Vokshi dhe Eralda Bano, të dyja pjesë e grupit të PD-së që janë rikthyer në selinë blu pas një periudhe të gjatë distancimi nga Lulzim Basha. Përveç tyre, Flamur Noka, i cili mori drejtimin e PD-së në mungesë të Berishës, do të jetë gjithashtu pranë tij në seancën e sotme.
