Situata nga zjarret vijon të mbetet kritike, ndërsa një nga vatrat më problematike është zhvendosur drejt fshatit Peshtan i Vogël.
Flakët po përhapen me shpejtësi, duke rrezikuar banesat dhe sipërfaqe të konsiderueshme me ullinj. Për shkak të rrezikut të drejtpërdrejtë, autoritetet kanë nisur evakuimin e banorëve nga zona.
Zjarri ka shkaktuar dëme të mëdha ekonomike për banorët, pasi flakët kanë përfshirë ullishte dhe pemë që ndodheshin në prodhim.
Të indinjuar nga situata, banorët shprehen se dëmet mund të ishin shmangur nëse ndërhyrja për shuarjen e flakëve do të kishte qenë më e shpejtë dhe më efikase në momentet e para.
Sipas tyre, vonesat në ndërhyrje kanë bërë që vatra të përhapej dhe situata të dilte jashtë kontrollit.
