Një emigrant shqiptar që jeton në Suedi ka shprehur shqetësime serioze për mënyrën si po zbatohet procesi i votimit në Shqipëri, duke akuzuar Komisionin Qendror të Zgjedhjeve (KQZ) për cenimin e fshehtësisë së votës.
Në një denoncim të transmetuar në emisionin “Fiks Fare”, ai deklaroi se fleta e votimit që kishte dërguar ishte vendosur në një zarf të verdhë me barkod, përmes të cilit mund të identifikoheshin të dhënat e tij personale.
“Si mund të flasim për fshehtësi të votës, kur përmes barkodit mbi zarf mund të zbulohet vota ime?”, pyeti emigranti, duke theksuar se kjo përbën një shkelje të qartë të ligjit dhe të parimit kushtetues të votës së fshehtë.
Procesi i votimit për diasporën shqiptare në zgjedhjet parlamentare të 11 majit 2025 ka përfshirë një investim të madh prej mbi 13 milionë eurosh, që është përdorur për ndërtimin e infrastrukturës teknologjike, mbulimin e shërbimeve postare dhe asistencën administrative. Megjithatë, shumë emigrantë mbeten të paqartë dhe të shqetësuar për transparencën dhe sigurinë e procesit.
Në përgjigje të denoncimit, KQZ sqaroi për “Fiks Fare” se fleta e votimit vendoset fillimisht në një zarf të bardhë, i cili më pas futet në një zarf tjetër që mban të dhënat e votuesit. Pasi zarfi i jashtëm mbërrin në destinacion, ai hapet dhe asgjësohet, ndërsa zarfi i bardhë ruhet për procesin e mëvonshëm të numërimit.
KQZ thekson se e gjithë procedura monitorohet nga kamerat dhe transmetohet drejtpërdrejt në kanalin zyrtar në YouTube. Votat e emigrantëve do të llogariten në qarkun ku ata kanë pasur banimin e fundit përpara emigrimit.
