Kryeministri Edi Rama, mëngjesin e kësaj të enjteje është ndalur sërish te debati për investimin në Zvërnec, duke mbrojtur nevojën për tërheqjen e investimeve të huaja si një domosdoshmëri për zhvillimin ekonomik të vendit.
Gjatë një takimi me pensionistë, Rama tha se premtimet realizohen kur krijohen mundësitë financiare, ndërsa theksoi se Shqipëria nuk mund t’i konsiderojë investimet e huaja si kërcënim për sovranitetin, por si një mjet për të rritur ekonominë dhe konkurrueshmërinë e saj.
Rama: Zotimet nuk mbahen sa hap e mbyll sytë, por kur janë mundësitë. Ne vetëm këtë punë emi, zgjerimi i mundësive. Zgjerimi i mundësive bëhet duke zgjeruar bazën e ekonomisë. E kemi nisur këtë punë me një prodhim të përgjithshëm të ekonomisë nën 10 mld euro, sot jemi mbi 27 mld. Duam ta çojmë 35 mld brenda vitit 2030. Duhet të rrisim ekonominë me investime, duhet të kemi investime të brendshme dhe investime të huaja.
Do vij dhe këtu se e di që jeni të interesuar për këto tema të nxehta. Nuk e kemi harruar dhe nuk kemi si ta harrojmë që thembra e Akilit në gjithë këtë progres është shëndetësia, ku tanimë transformimi i madh duhet shoqëruar me një rritje të cilësisë së shërbimit, të cilësisë së barnave etj. Kemi vendosur 15 mln euro vetëm për barnat onkologjike, do fuqizojmë kapacitetet e sistemit që të bëjmë më të mirën për kurimin e pacientëve.
Ndërkohë po pregatitemi për të bërë një hap tjetër gjithmonë në bazë të mandatit që kemi marrë. Kemi rreth një muaj që po dëgjojmë çudira të mëdha. Nuk mendoj se i është lënë Shqipërisë dhe shqiptarëve për të shpikur rrotën. Ne duhet të rrisim kapacitetet tona për të konkurruar me të tjerët. Shqipëria nuk mund t’i cilësojë investimet e huaja kërcënim për sovranitetin dhe për integritetin territorial. Atdhetari dhe patriotizëm nuk është të refuzosh investimet e huaja, por të rrisës kapacitetin ekonomik të vendit.
