Këshilli i Lartë Gjyqësor synon të zgjerojë ndjeshëm numrin e gjyqtarëve në Shqipëri, në përpjekje për të ulur stokun e dosjeve të prapambetura dhe për të shkurtuar kohën e pritjes për qytetarët. Përmes një projektvendimi të hedhur për konsultim publik, KLGJ propozon shtimin e 84 pozicioneve të përhershme dhe krijimin e 18 vendeve rezervë.
Me këtë ndryshim, organika e përhershme e sistemit gjyqësor do të arrinte në 519 gjyqtarë. Ndërkohë, parashikohet edhe një paketë e përkohshme me 9 gjyqtarë shtesë në Gjykatën e Lartë, të cilët do të angazhohen për një mandat të vetëm në shqyrtimin e çështjeve të mbartura.
Pjesa më e madhe e pozicioneve të reja do t’u caktohet gjykatave të shkallës së parë. Sipas propozimit, 44 vende do të shpërndahen në gjykatat e juridiksionit të përgjithshëm, ku Tiranës i takojnë 18 pozicione, Durrësit 6, Elbasanit 5, Fierit 6, Korçës 3, Shkodrës 3 dhe Vlorës 3.
Për gjykatat administrative parashikohen 18 vende të reja, nga të cilat 16 në Tiranë dhe 2 në Lushnjë. Ndërsa Gjykata e Posaçme e Shkallës së Parë për Korrupsionin dhe Krimin e Organizuar do të përfitojë dy pozicione shtesë.
Plotësimi i organikës së re parashikohet të kryhet gradualisht deri në vitin 2030, kryesisht përmes emërimeve të magjistratëve të rinj që dalin nga Shkolla e Magjistraturës. Vendet rezervë do të përdoren për të mbuluar vakancat që krijohen kur gjyqtarët angazhohen në institucione të tjera.
Plani nuk kufizohet vetëm te shtimi i trupës gjyqësore. Dokumenti parashikon edhe rritjen e stafit administrativ, si dhe investime në ndërtesat dhe infrastrukturën teknologjike të gjykatave. Për 102 pozicionet e përhershme dhe paketën e përkohshme në Gjykatën e Lartë kërkohet gjithashtu një kapacitet i konsiderueshëm punonjësish jogjyqtarë.
Kostoja e përgjithshme e planit vlerësohet rreth 14 milionë euro në vit.
Megjithatë, sfida kryesore mbetet plotësimi i vendeve aktualisht të miratuara. Sipas të dhënave të paraqitura në dokument, nga 417 pozicione të parashikuara në organikën ekzistuese, vetëm 309 gjyqtarë janë efektivisht në detyrë. Vakancat dhe ritmi i ngadaltë i emërimeve vijojnë të kufizojnë kapacitetet e sistemit gjyqësor.
