Forcat e Armatosura të Shteteve të Bashkuara ndërmorën në orët e para të së mërkurës një valë të re bombardimesh ndaj Iranit, duke goditur objektiva më të thella brenda territorit iranian.
Sipas raportimeve, në shënjestër mund të ketë qenë edhe zona pranë Teheranit.
Sipas Komandës Qendrore të SHBA-së (CENTCOM), sulmet synojnë të dobësojnë aftësinë e Iranit për të kërcënuar lundrimin tregtar në Ngushticën e Hormuzit.
Operacioni zgjati rreth një orë e 15 minuta dhe u goditën forcat detare, hangarët e avionëve, depot e dronëve dhe infrastrukturës ushtarake.
Mediat iraniane raportuan shpërthime në disa provinca. Po ashtu, pati raportime për aktivizimin e mbrojtjes ajrore në Kuvajt për shkak të raketave dhe dronëve që dyshohet se u lëshuan nga Irani.
Presidenti amerikan Donald Trump deklaroi se faza e ardhshme e operacioneve mund të ketë në shënjestër objektet bërthamore të Iranit, duke lënë të kuptohet se Teherani nuk do të jetë në gjendje ta pengojë një veprim të tillë.
Nga ana tjetër, Sekretari amerikan i Shtetit, Marco Rubio, paralajmëroi se nëse Irani do të arrinte të kontrollonte Ngushticën e Hormuzit, kjo do të krijonte një precedent të rrezikshëm për tregtinë dhe lundrimin ndërkombëtar.
Për herë të parë që nga rifillimi i konfliktit, në Teheran u aktivizuan sistemet e mbrojtjes kundërajrore dhe u dëgjuan shpërthime në pjesën verilindore të qytetit.
Ndërkohë, rebelët Huthi në Jemen kërcënuan hapjen e një fronti të ri në Detin e Kuq, gjë që mund të ndikojë rëndë në tregtinë globale, pasi si Ngushtica e Bab el-Mandeb ashtu edhe ajo e Hormuzit janë rrugë kyçe për transportin detar.
Në tregjet ndërkombëtare, tensionet kanë bërë që çmimet e naftës të rriten. Nafta Brent arriti mbi 92 dollarë për fuçi, ndërsa West Texas Intermediate (WTI) u ngjit mbi 85 dollarë për fuçi, nivelet më të larta në më shumë se një muaj.
