Shqipëria ka marrë një fitore shumë të rëndësishme 2-0 ndaj Finlandës në “Air Albania”, duke forcuar pozitat në krye të Grupit C1 të Nations League.
Kuqezinjtë zhvilluan një ndeshje të kontrolluar dhe goditën në momentet e duhura, me Ernest Muçin dhe Rey Manajn që firmosën suksesin.
Goli i parë erdhi në minutën e 35-të. Muçi realizoi një nga golat më të bukur të mbrëmjes, duke dërguar topin në rrjetë me një goditje spektakolare me të jashtmen.
Finlanda tentoi të reagonte përpara pushimit, por Etrit Berisha u tregua vendimtar me një pritje të shkëlqyer ndaj goditjes me kokë të Tenhos.
Vetëm pesë minuta pas nisjes së pjesës së dytë, Shqipëria dyfishoi avantazhin. Elseid Hysaj krosoi nga e djathta dhe Rey Manaj finalizoi saktë me kokë për 2-0.
Situata u bë edhe më e favorshme për kuqezinjtë në minutën e 67-të, kur Tenho u ndëshkua me karton të kuq pas një ndërhyrjeje të rëndë ndaj Muçit.
Me një lojtar më shumë, Shqipëria administroi pa probleme avantazhin dhe pati edhe mundësi për ta thelluar rezultatin.
Me këtë fitore, kuqezinjtë ngjiten në 12 pikë dhe blindojnë vendin e parë në grup.
Tashmë vëmendja kalon te përballja ndaj Bjellorusisë, ku Shqipërisë do t’i mjaftojë edhe një barazim për të siguruar objektivin dhe për t’u afruar përfundimisht me rikthimin në Ligën B.
