Rusia ka njoftuar se planifikon të ndërtojë një central energjetik në Hënë brenda dekadës së ardhshme, me synim furnizimin me energji të programit të saj hapësinor hënor dhe një stacioni të përbashkët kërkimor ruso-kinez.
Sipas agjencisë Reuters, korporata shtetërore hapësinore Roscosmos ka bërë të ditur se centrali pritet të përfundojë deri në vitin 2036 dhe se është nënshkruar një kontratë me kompaninë Lavochkin Association për realizimin e projektit.
Megjithëse Roscosmos nuk e ka cilësuar shprehimisht centralin si bërthamor, në projekt përfshihen Rosatom dhe Instituti Kurchatov, institucioni kryesor rus për kërkimin bërthamor, çka sugjeron se bëhet fjalë për një burim energjie nukleare.
Sipas Roscosmos, centrali do të shërbejë për furnizimin me energji të:
roverëve hënorë
infrastrukturës së Stacionit Ndërkombëtar të Kërkimit Hënor që Rusia synon të ndërtojë në bashkëpunim me Kinën
“Ky projekt përfaqëson një hap të rëndësishëm drejt krijimit të një pranie të përhershme shkencore në Hënë dhe kalimit nga misione sporadike në një program afatgjatë eksplorimi,” thuhet në deklaratën zyrtare.
Ambiciet hapësinore të Rusisë kanë hasur vështirësi vitet e fundit, veçanërisht pas dështimit të misionit Luna-25 në gusht 2023, kur mjeti pa pilot u përplas me sipërfaqen e Hënës gjatë tentativës për ulje.
