Cristiano Ronaldo është larguar nga grumbullimi i kombëtares së Portugalisë, duke shkaktuar një valë reagimesh dhe pikëpyetjesh rreth së ardhmes së tij me përfaqësuesen.
Gjithçka nisi pas ndeshjes ndaj Norvegjisë, ku 41-vjeçari u nxeh për rreth 30 minuta, por në fund nuk u aktivizua nga trajneri Jorge Jesus. Pas konferencës së këtij të fundit dhe një bisede me presidentin e Federatës Portugeze të Futbollit, Ronaldo vendosi të largohej nga grumbullimi.
“Pas konferencës së trajnerit dhe pas një bisede me presidentin e Federatës, vendosa të largohem nga grumbullimi. Në momentin e duhur do t’u tregoj të gjithë portugezëve të vërtetën për arsyet që më shtynë të marr këtë vendim. Tani i uroj Portugalisë dhe të gjithë shokëve të skuadrës fat”, shkroi Ronaldo në rrjetet sociale.
Situata ka shkaktuar debat të madh në Portugali, ku disa media kanë ngritur edhe mundësinë që ky të jetë fundi i aventurës së CR7 me kombëtaren. Megjithatë, vetë Ronaldo nuk ka njoftuar tërheqjen dhe ka lënë të kuptohet se do të flasë më gjerësisht në një moment të dytë.
Trajneri Jorge Jesus kishte deklaruar se “nuk ekziston një çështje Cristiano”, por mediat portugeze e kanë lidhur largimin me pakënaqësinë e sulmuesit për rolin e tij në skuadër.
Ronaldo ka zhvilluar 234 ndeshje dhe ka shënuar 146 gola me Portugalinë që prej debutimit të tij në vitin 2003, duke fituar Euro 2016 dhe dy edicione të Nations League.
