Kryeministri Edi Rama ka deklaruar se Shqipëria ka një rrugë të qartë drejt Bashkimit Europian. Në një deklaratë për britaniken “Financial Times” Rama ka theksuar se vendi ynë po përjeton momentet më të mira në shumë aspekte.
“Kemi një rrugë të qartë drejt Bashkimit Europian. Vendi është në momentin më të mirë në shumë aspekte”, tha Edi Rama.
Financia Times citon kryeministrin shqiptar Edi Rama në një shkrim për perspektivën e anëtarësimit të vendeve të Ballkanit Perëndimor, Ukrainës e Moldavisë në Bashkimin Europian. Me titullin “Sot ose kurrë, a është serioz Bashkimi Europian për të pranuar anëtarë të rinj?” Financial Times analizon procesin e zgjerimit.
Në këtë shkrim vihet në dukje se për 13 vite klubi i Bashkimit Europian nuk ka pranuar asnjë vend të ri, por pas shokut që erdhi për shkak të agresionit rus mbi Ukrainën, procesi i zgjerimit u pa si një element i rëndësishëm edhe për sigurinë duke rritur shpresat për anëtarësime të reja.
Megjithatë gazetarët britanikë ngrejnë pikëpyetje nëse premtimet e Brukselit janë apo jo serioze, dhe testi i parë duket se do të jetë Mali i Zi i cili pritet të mbyllë negociatat për të gjithë kapitujt në fundin e këtij viti.
