Manchester United ka njoftuar zyrtarisht largimin e Michael Carrick nga posti i trajnerit, vetëm disa muaj pasi anglezi kishte firmosur kontratë deri në vitin 2029.
Carrick ishte rikthyer fillimisht si trajner i përkohshëm dhe, pas një fundi pozitiv të sezonit të kaluar që i siguroi United rikthimin në Champions League, mori drejtimin në mënyrë të përhershme.
Megjithatë, nisja e këtij sezoni ka qenë shumë e dobët. “Djajtë e Kuq” kanë regjistruar vetëm tri fitore në 15 ndeshje në të gjitha kompeticionet dhe nuk fitojnë në Premier League që prej 30 gushtit.
Pas tetë ndeshjeve radhazi pa fitore, United ndodhet në vendin e 18-të në kampionat, një situatë që ka bindur drejtuesit të ndërhyjnë.
“Michael është dhe do të mbetet gjithmonë një legjendë e Manchester United. Ai është sjellë me përkushtim dhe profesionalizëm maksimal dhe arritjet e sezonit të kaluar do të kujtohen me respekt”, thuhet në komunikatën e klubit.
Tashmë vëmendja kalon te pasuesi i tij. Mauricio Pochettino është kandidati kryesor dhe po negocion largimin nga Kombëtarja e Shteteve të Bashkuara.
United pritet të paguajë mbi tetë milionë euro për klauzolën e lirimit të argjentinasit, i cili prej kohësh ka qenë në listën e dëshirave të klubit.
Nëse marrëveshja finalizohet, Pochettino do të bëhet trajneri i 12-të që merr drejtimin e Manchester United që prej largimit të Sir Alex Ferguson.
