E ardhmja e Erling Haaland te Manchester City mund të vihet në diskutim nëse klubi anglez përballet me një dënim të rëndë për çështjet e Fair Play-t Financiar.
Sipas raportimit, vendimi pritet në janar dhe një skenar ekstrem, si rënia në Championship apo mungesa në Champions League, mund të shtyjë disa prej yjeve të skuadrës të kërkojnë largimin.
Haaland është një nga emrat që përmendet më së shumti. Sulmuesi norvegjez ka kontratë deri në vitin 2034, por do të ishte e vështirë të imagjinohej që një lojtar i profilit të tij të qëndronte jashtë elitës europiane.
Megjithatë, rrethi i lojtarit nuk po spekulon për momentin. Sipas “AS”, njerëzit pranë Haaland presin fillimisht të kuptojnë nëse do të ketë një dënim dhe kur ai mund të hyjë në fuqi.
Ndërkohë, në Angli kanë nisur edhe parashikimet për destinacionin e tij të ardhshëm.
Paul Scholes, ish-mesfushori i Manchester United, beson se në rast largimi nga City, Haaland mund të përfundojë te Barcelona.
“Duket si një lojtar për Real Madridin, mund ta imagjinoj fare mirë me atë fanellë… por mendoj se do të shkojë te Barça”, deklaroi Scholes.
Për momentin gjithçka mbetet në nivel skenarësh, por çdo vendim i rëndë ndaj Manchester City mund ta kthejë të ardhmen e Haaland në një nga temat më të mëdha të merkatos.
