Agjencia Ndërkombëtare e Energjisë (IEA) prezantoi të hënën një sërë propozimesh për të lehtësuar barrën e konsumatorëve nga rritja e çmimeve të energjisë, e shkaktuar nga tensionet e fundit në Lindjen e Mesme. Kjo vjen pas vendimit të agjencisë këtë muaj për një lirim rekord prej 400 milionë fuçish nga rezervat strategjike të naftës, për t’u përballur me pasojat e konfliktit SHBA-Izrael me Iran.
Drejtori Ekzekutiv i IEA-s, Fatih Birol, tha se propozimet përfshijnë masa që qeveritë, bizneset dhe familjet mund të ndërmarrin menjëherë, duke përfshirë punën nga shtëpia, uljen e kufizimeve të shpejtësisë në autostrada me të paktën 10 km/orë dhe shmangien e udhëtimeve ajrore kur janë në dispozicion alternativa transporti.
Organizata gjithashtu inkurajon konsumatorët të gatuajnë me energji elektrike në vend të gazit, ndërsa industria duhet të optimizojë përdorimin e hidrokarbureve. Birol shtoi se këto masa janë pjesë e një strategjie globale për të mbrojtur konsumatorët dhe për të zbutur ndikimin e krizës energjetike që ka rritur shqetësimet për inflacion në mbarë botën.
Vendimi për lirimin e 400 milionë fuçive nga rezervat strategjike, i marrë më 11 mars nga KON-i, shënon një ndërhyrje të jashtëzakonshme për të stabilizuar çmimet e naftës dhe për të ndihmuar tregun global të energjisë.
