Real Madrid ka marrë një tjetër fitore bindëse në La Liga, duke mposhtur 3-0 Valencian në “Mestalla” dhe duke regjistruar suksesin e tetë radhazi.
Skuadra e José Mourinhos kontrolloi pjesën më të madhe të takimit, edhe pse Valencia pati rastin e parë të madh. Pas një gabimi të Tchouaménit pranë zonës, Mayol provoi portën, por Courtois reagoi me një pritje të shkëlqyer.
Vetëm pak çaste më vonë, Guido Rodríguez gjeti rrjetën pas një goditjeje këndi, por goli u anulua për pozicion jashtë loje.
Real Madrid zhbllokoi sfidën pranë gjysmëorës së lojës. Mbappé ekzekutoi një goditje dënimi që u përplas në mur, ndërsa topi përfundoi te Federico Valverde. Uruguaiani lëshoi një goditje të fuqishme dhe të saktë, duke mposhtur Dimitrievskin për 0-1.
Avantazhi u dyfishua pak më vonë. Jude Bellingham depërtoi në zonën e Valencias dhe dërgoi një top drejt qendrës, i cili u devijua lehtë nga Tárrega. Arda Güler përfitoi dhe realizoi me të djathtën golin e dytë të madrilenëve.
Me këtë realizim, turku arrin në nëntë kontribute direkte në gol në 16 ndeshje këtë sezon, me katër gola dhe pesë asistime. Vetëm Mbappé ka shifra më të mira te Real Madrid.
Në pjesën e dytë, madrilenët iu afruan edhe golave të tjerë. Bellingham shpërtheu në një aksion individual, por Dimitrievski e ndali me këmbë, ndërsa menjëherë më pas portieri i Valencias neutralizoi edhe një roveshatë të Mbappé.
Francezi gjithsesi nuk mungoi në listën e golashënuesve. Arda Güler dha një pasim të shkëlqyer në thellësi, Mbappé shmangu daljen e Dimitrievskit dhe realizoi me portën e boshatisur për 0-3.
Për numrin 10 ishte goli i 13-të i sezonit.
Pak minuta më vonë, Valencia mbeti edhe me dhjetë lojtarë, pasi Gayà u ndëshkua me karton të kuq pas një ndërhyrjeje të vonuar ndaj Mbappé në një kundërsulm.
Real Madrid largohet kështu nga “Mestalla” me tri pikë të tjera, tre gola të shënuar dhe një tjetër fitore që konfirmon momentin e fortë të skuadrës së Mourinhos.
