Conor McGregor përjetoi skenarin më të keq të mundshëm në rikthimin e tij të shumëpritur në UFC.
Irlandezi, i cili kthehej në kafaz pas pesë vitesh mungesë, u përball me Max Holloway në UFC 329 në Las Vegas, por gjithçka përfundoi në mënyrë dramatike që në raundin e parë. Me goditjet e para, McGregor pësoi një dëmtim në gjurin e majtë dhe dueli nuk zgjati as një minutë.
Atmosfera në arenë ishte elektrizuese para nisjes së sfidës. McGregor hyri me flamurin irlandez mbi supe dhe me pamjen e tij karakteristike, ndërsa tifozët prisnin një tjetër natë të madhe nga “The Notorious”. Por entuziazmi u shua shumë shpejt.
Sapo nisi ndeshja, McGregor tentoi të sulmonte me goditje spektakolare, por pak sekonda më vonë preku këmbën dhe nisi të humbiste ekuilibrin. Holloway përfitoi nga momenti dhe e goditi në tokë, por shumë shpejt kuptoi se rivali ishte dëmtuar seriozisht.
Hawaiiani pa nga arbitri, duke sinjalizuar se McGregor nuk ishte në gjendje të vazhdonte normalisht. Irlandezi u ngrit, por çalimi ishte i dukshëm dhe pak çaste më vonë iu drejtua arbitrit duke mbajtur gjurin.
Sfida u ndërpre dhe Max Holloway u shpall fitues me TKO në raundin e parë. Një fund i hidhur për një nga rikthimet më të pritura në historinë e UFC-së.
Pas ndeshjes, Holloway tregoi respekt për McGregor, pavarësisht mënyrës së çuditshme si erdhi fitorja.
“Duartrokitni McGregor, është një luftëtar i vërtetë. Ishte jashtë për shumë kohë dhe u kthye. Doja të zhvilloja një ndeshje të madhe, kam punuar shumë për këtë moment. Të fitosh kështu është e tmerrshme”, u shpreh Holloway.
McGregor u largua nga kafazi me fytyrë të zhgënjyer dhe të trishtuar, ndërsa mbrëmja që duhej të shënonte rikthimin e madh u kthye në një natë për t’u harruar.
