Armando Broja po lë pas një periudhë të vështirë të shoqëruar me dëmtime dhe po rikthehet gradualisht në formën e tij më të mirë te Burnley në Premier League. Sulmuesi i Kombëtares shqiptare po tregon se është sërish një faktor i rëndësishëm për skuadrën, duke fituar vlerësime pozitive për paraqitjet e fundit.
Si dëshmi e këtij rikthimi, Broja është përfshirë në formacionin më të mirë të javës në Premier League, pas performancës së tij ndaj Newcastle. Faqja e specializuar e statistikave “WhoScored” e ka vlerësuar me notën 7.45, falë asistit vendimtar që regjistroi në atë takim.
Në ekipin ideal të javës, Broja është pozicionuar në repartin ofensiv, duke formuar dyshe sulmuese me Uisa. Ky vlerësim konfirmon momentin pozitiv të futbollistit shqiptar dhe rrit shpresat për një vazhdimësi të mirë të sezonit në elitën e futbollit anglez.
