Real Sociedad është shpallur kampione e Kupës së Mbretit, pasi mposhti Atletico Madridin 4-3 pas penalltive në finalen e zhvilluar në “La Cartuja”, pas barazimit 2-2 në kohën e rregullt dhe shtesë.
Heroi i mbrëmjes ishte Pablo Marin, i cili shënoi penalltinë vendimtare dhe i dhuroi skuadrës nga San Sebastian trofeun e vitit 2026. Në serinë e penalltive, Marrero priti goditjet e Sorloth dhe Julian Alvarez, ndërsa Musso ndali vetëm tentativën e Oskarsson. Soler, Nico, Sucic, Almada dhe Aihen realizuan për Real Sociedad, ndërsa goli i fundit i Pablo Marin vulosi triumfin.
Finalja nisi në mënyrë të jashtëzakonshme për Real Sociedad, që kaloi në avantazh pas vetëm 14 sekondash me Ander Barrenetxea, i cili vendosi një rekord si autori i golit më të shpejtë në historinë e finaleve të Kupës së Mbretit.
Atletico reagoi shpejt dhe barazoi në minutën e 18-të falë Ademola Lookman, i cili realizoi me një goditje të bukur me të majtën. Megjithatë, pak para fundit të pjesës së parë, Real Sociedad fitoi një penallti pas ndërhyrjes së Musso ndaj Guedes, ndërsa Mikel Oyarzabal tregoi saktësi nga pika e bardhë për ta çuar skuadrën e tij në pushim me epërsinë 2-1.
Në pjesën e dytë, Atletico Madrid shtoi presionin dhe kërkoi me ngulm golin e barazimit. Skuadra e Simeone krijoi disa raste të mira, por duhej të priste deri në minutën e 83-të, kur Julian Alvarez nxori nga repertori i tij një goditje spektakolare nga jashtë zone për të barazuar gjithçka në 2-2 dhe për ta çuar finalen në shtesë.
Në kohën shtesë, të dyja skuadrat patën rastet e tyre, por askush nuk arriti ta gjente golin vendimtar. Oskarsson humbi një mundësi të artë për Real Sociedad, ndërsa Julian Alvarez goditi traversën për Atletico. Në fund, gjithçka u vendos nga pika e bardhë.
Merita të mëdha për këtë sukses i takojnë trajnerit Pellegrino Matarazzo, i cili mori drejtimin e skuadrës në dhjetor 2025 dhe arriti ta transformojë Real Sociedad, duke e udhëhequr drejt një trofeu të merituar.
