Pas fitores dramatike 3-2 ndaj Lech Poznan në Ligën e Konferencës, trajneri i Rayo Vallecano, Iñigo Pérez, u largua nga stadiumi pa marrë pjesë në konferencën për shtyp. Klubi njoftoi se arsyeja ishte “gjendja e keqe shëndetësore” e trajnerit, megjithatë raportimet sugjerojnë se shkaku mund të ketë qenë një përplasje verbale me mbrojtësin Iván Balliu.
Në vend të tij, para mediave doli drejtori sportiv David Cobeño, i cili deklaroi: “Iñigo u ndje keq dhe u largua. Gjithçka ndodhi shumë shpejt.” Presidenti Raúl Martín Presa përsëriti të njëjtin version, duke theksuar se trajneri “u largua për arsye shëndetësore.”
Megjithatë, në zonën e përzier, disa lojtarë pranuan se kishte pasur tension në dhomat e zhveshjes. “Këto gjëra ndodhin. Iñigo është njeri emocional — ndonjëherë është i fundit që largohet, ndonjëherë i pari,” tha mesfushori Pedro Díaz.
