Këshilli i Lartë i Sportit në Spanjë (CSD) po shqyrton mundësinë e ndërhyrjes me iniciativën e tij pas deklaratave të Javier Tebas, president i LaLiga-s dhe zëvendëspresident i Federatës Spanjolle të Futbollit, lidhur me Real Madrid TV.
Sipas EFE-s, CSD po analizon deklaratat e Tebas, i cili krahasoi mënyrën e funksionimit të televizionit zyrtar të Real Madridit me mekanizmat e propagandës së përdorur nga Joseph Goebbels në Gjermaninë naziste.
Tebas reagoi menjëherë ndaj lajmit.
“Nuk mund ta besoj lajmin se CSD po shqyrton të ndërhyjë për shkak të deklaratave të mia. Nëse konfirmohet, shpresoj që hetimi të nisë duke lexuar atë që kam shkruar dhe duke shqyrtuar disa prej deklaratave të mia të mëparshme”, deklaroi ai.
Presidenti i LaLiga-s kishte akuzuar Real Madrid TV se paraqet vazhdimisht klubin si viktimë, duke përzgjedhur episodet që mbështesin narrativën e tij dhe duke ushqyer dyshimet ndaj kundërshtarëve.
“Metoda të kujton mekanizmat e propagandës të përdorur nga Goebbels: përsëritjen sistematike, krijimin e një armiku dhe nënshtrimin e fakteve ndaj narrativës”, kishte shkruar Tebas, duke sqaruar se krahasimi lidhej me teknikat e propagandës dhe jo me ideologjinë naziste apo tifozët e Real Madridit.
Reagimi i klubit madrilen ishte shumë i ashpër. Real Madridi kërkoi dorëheqjen e menjëhershme të Tebas nga postet e tij në LaLiga dhe RFEF, duke i cilësuar deklaratat e tij “absolutisht të patolerueshme dhe jashtëzakonisht të rënda”.
Pas lajmit për një ndërhyrje të mundshme të CSD-së, Tebas solli si shembull edhe deklaratën e Florentino Pérez se mund të kishte fituar 14 tituj kampion, por të tjerët “ia kishin vjedhur”.
Tebas kërkoi që institucionet të përdorin të njëjtat kritere në raste të tilla.
“Çfarë kriteresh përdoren për të vlerësuar një deklaratë dhe një tjetër? Konsistenca institucionale është thelbësore. Le të lexojnë atë që kam shkruar, të shpjegojnë kriteret dhe t’i zbatojnë në mënyrë të pavarur. Liria e shprehjes nuk mund të varet nga mbiemri i personit që flet”, deklaroi ai.
Ndërkohë, Shoqata për Transparencë dhe Demokraci në Sport, e drejtuar nga Miguel Galán, ka paraqitur gjithashtu një ankesë ndaj Tebas në CSD.
Sipas Galán, kjo është ankesa e tetë e depozituar prej tij ndaj presidentit të LaLiga-s, ndërsa në kërkesë synohet shkarkimi i Tebas dhe më pas ndalimi i tij për të mbajtur poste në institucionet sportive.
