Kryetari i Partisë Demokratike, Sali Berisha, ka reaguar ndaj nismës së qeverisë për krijimin e portalit të ri “Pasqyra Albania”, duke e cilësuar atë si një tjetër projekt abuziv dhe mënyrë për të shpërdoruar miliona nga paratë publike.
Sipas Berishës, platforma, e prezantuar nga kryeministri Edi Rama si një mjet i ri komunikimi mes qytetarëve dhe institucioneve, nuk do t’u shërbejë realisht qytetarëve.
Në reagimin e tij, Berisha e akuzon qeverinë se përmes këtij projekti synon të shpenzojë miliona dollarë, ndërsa e cilëson “Pasqyra Albania” si “një mashtrim të ri” dhe “një mur të ri midis qytetarit dhe administratës”.
Reagimi i plotë i Berishës
“Pasqyrë Albania”, Diella e re shumë milionëshe!”
“Në serialin e mashtrimeve të tij të kësaj vere, Edi Rama, i bronzuar por i tromaksur dhe i skaduar, pas dështimit me Besën dhe Besimin, njoftoi nga Pogradeci portalin e ri “Pasqyra Albania” si mjetin e komunikimit me qytetarët për hallet e tyre. Në fakt, me këtë ai njoftoi vjedhjen e re të miliona dollarëve për “Pasqyra Albania”, në të cilën, sipas tij, qytetari do të mund të ndjekë ankesën apo kërkesën e tij. Natyrisht, pasqyra është një mashtrim i ri, një mur i ri midis qytetarit dhe administratës, e cila do t’u shërbejë qytetarëve aq sa Diella luftës kundër vjedhjeve qeveritare”, shkruan Berisha.
