Presidenti Bajram Begaj zhvilloi këtë të premte një vizitë në Përmet, ku vlerësoi modelin e zhvillimit të qytetit, të mbështetur te trashëgimia kulturore dhe fetare, resurset natyrore dhe produktet tradicionale.
Gjatë takimit me kryetaren e Bashkisë, Alma Hoxha, dhe drejtuesit vendorë, Begaj u njoh me rritjen e numrit të turistëve dhe kthimin e të rinjve nga emigracioni për të investuar në zonë.
Presidenti vizitoi lagjen historike të qytetit, ku banesat tradicionale të rikonstruktuara janë kthyer në struktura pritëse dhe pika tërheqëse për vizitorët.
Pjesë e vizitës ishin edhe sipërmarrje të vogla familjare në hoteleri, si dhe punishte artizanale për prodhimin e verës dhe glikosë.
Begaj vlerësoi emigrantët që kanë sjellë në Përmet përvojat e fituara jashtë vendit, duke i cilësuar investimet e tyre si një mundësi për zhvillimin ekonomik dhe turizmin e qëndrueshëm.
Në Inkubatorin e Përpunimit të Produkteve Bujqësore, kreu i shtetit theksoi rëndësinë e mbështetjes së fermerëve në grumbullimin, përpunimin dhe certifikimin e produkteve bio.
Sipas tij, nisma të tilla ndihmojnë në ruajtjen e markës përmetare dhe promovimin e cilësisë së produkteve shqiptare brenda dhe jashtë vendit.
Begaj vizitoi gjithashtu Kishën e Shën Marisë në Leusë, të njohur për arkitekturën bizantine dhe afresket e rralla, duke nënvizuar rëndësinë e trashëgimisë kulturore dhe fetare për zhvillimin e turizmit.
