E ardhmja e Cristiano Ronaldos me Portugalinë vazhdon të mbetet e paqartë pas largimit të tij të papritur nga grumbullimi, ndërsa vendi është ndarë mes mbështetësve të kapitenit dhe kritikëve të mënyrës se si ai reagoi.
Gjithçka nisi në sfidën ndaj Norvegjisë, kur Ronaldo u dërgua për t’u nxehur, por nuk u aktivizua. Pas ndeshjes, 41-vjeçari u largua drejt dhomave të zhveshjes dhe më pas, pasi mësoi se nuk do të ishte titullar as ndaj Danimarkës, vendosi të largohej nga grumbullimi.
Në një reagim në rrjetet sociale, Ronaldo paralajmëroi se “në momentin e duhur” do t’u tregonte portugezëve arsyet e largimit të tij.
Presidenti i Federatës Portugeze, Pedro Proença, tentoi të ndërhynte për të qetësuar situatën, ndërsa Jorge Jesus ka lënë të hapur mundësinë e rikthimit të kapitenit.
“Nëse dëshiron, do të rikthehet në kombëtare. Mund të flasim para grumbullimit të ardhshëm, por Cristiano është ai që duhet të vendosë se si dëshiron ta mbyllë aventurën e tij me kombëtaren”, deklaroi Jesus.
Situata ka ndarë edhe tifozët portugezë. Në Lisbonë janë shfaqur pankarta në mbështetje të Ronaldos dhe kritika ndaj trajnerit, ndërsa një pjesë tjetër e opinionit dhe mediave ka kritikuar sjelljen e sulmuesit.
Ronaldo numëron 234 ndeshje dhe 146 gola me Portugalinë, ndërsa tani përballet me një nga vendimet më të rëndësishme të karrierës së tij: të rikthehet për të vazhduar me kombëtaren apo t’i japë fund një historie që ka zgjatur më shumë se dy dekada.
