Një vajzë 17 vjeçe me probleme të shëndetit mendor është shpëtuar nga shërbimet e Policisë së Shtetit dhe ato Kufitare në Pogradec, pasi ishte futur në liqen dhe rrezikonte të mbytej.
Sipas raportimeve, efektivët reaguan me shpejtësi dhe me profesionalizëm duke i shpëtuar jetën.
Pas marrjes së njoftimit se një shtetase e mitur kishte hyrë në liqen, shërbimet e SPK Pogradec kanë shkuar menjëherë në adresën e dhënë. Pasi kanë konstatuar 17-vjeçaren, shërbimet e Policisë i kanë kërkuar që të afrohej te mjeti i Policisë Kufitare, po ajo ka refuzuar.
Në këto kushte, inspektori i Policisë M. D. është hedhur në ujë, ka marrë në krah 17-vjeçaren dhe e ka nxjerrë në breg. Adoleshentes iu dha ndihma e parë dhe më pas iu dorëzua familjarëve.
