Dueti i shumëpritur mes Arilena Arës dhe Pirro Çakos, “Zero Gradë”, ka shkaktuar një befasim të madh sot pasi është njoftuar se ka tërhequr pjesëmarrjen në natën finale të “Këngës Magjike 2024”. Sipas informacionit të dhënë nga Tvklan, producenti dhe drejtuesi i festivalit, Ardit Gjebrea, ka konfirmuar se arsyeja e tërheqjes është një problem shëndetësor.
“Edhe unë jam ftohur, por të paktën nuk do të këndoj. Për fat të keq, edhe Pirro është paqejf dhe për sa kohë që është në duet, më vjen keq që nuk do të jetë ky duet sonte në festival, por sëmundjes nuk ke ç’i bën,” – ka thënë Ardit Gjebrea përmes një deklarate, duke shpjeguar se gjendja shëndetësore e Pirros ka bërë që dueti të mos mund të realizohet.
Kjo tërheqje sjell si pasojë edhe heqjen nga gara të Arilena Arës, pasi kënga “Zero Gradë” ishte një duet mes dy artistëve. Kujtojmë që sot mbahet nata finale e “Këngës Magjike 2024”, një ngjarje e rëndësishme muzikore që përfshin 23 finalistë, të cilët do të garojnë për çmimin e madh.
