Duket se telashet nuk i ndahen aktivistit Drtian Goxhaj. Pas sulmeve të kryeministrit Edi Rama dhe socialistëve të tjerë, duke e quajtur si “agjent i Iranit”, Goxhaj është marrë nën hetim nga policia e Tiranës këtë të enjte.
Policia e Tiranës, bëri me dije se 11 persona janë proceduar penalisht për dy protesta ato të 22 dhe 23 qershorit, ku emri i Dritan Goxhajt është në mesin e tyre.
Procedimi ndaj 50-vjeçarit është bërë për pengim të qarkullimit të mjeteve, pasi sipas policisë ka bërë veprime që kanë cënuar rendin dhe qetësinë publike.
“Në vijim të veprimeve hetimore dhe procedurale të kryera nga strukturat e Komisariatit të Policisë Nr. 3, në lidhje me tubimet e zhvilluara më datat 22 dhe 23 qershor 2026, në Tiranë, janë identifikuar dhe proceduar penalisht 11 shtetas, të dyshuar të përfshirë në veprime që cenojnë rendin dhe qetësinë publike.
Konkretisht, u proceduan në gjendje të lirë, për veprën penale “Pengimi i qarkullimit të mjeteve të transportit”, shtetasit: D. G., 50 vjeç, I. D., 55 vjeç, E. E., 32 vjeç, E. B., 29 vjeç, V. D., 30 vjeç, E. Z., 26 vjeç, Xh. P., 27 vjeç, B. K., 36 vjeç, D. B., 32 vjeç, Sh. B., 34 vjeç dhe I. M., 28 vjeç.
Nga veprimet hetimore dyshohet se këta shtetas kanë orientuar dhe zhvilluar tubimin në zona të ndryshme prej atyre të njoftuara zyrtarisht, konkretisht në: kryqëzimin e rrugës “Urani Pano” me bulevardin “Zogu I”; kryqëzimin e rrugës “Ibrahim Rugova” me Rrugën e Kavajës; si dhe në kryqëzimin e rrugës “Ibrahim Rugova” me bulevardin “Gjergj Fishta””, thuhej në njoftimin e policisë.
Po ashtu Goxhaj para disa ditësh u thirr në policinë e Tiranës për disa deklarata që kishte bërë në një studio televizive muaj më parë në drejtim të klasës politike.
