Papa Leo XIV zhvilloi një takim të veçantë me disa nga emrat më të njohur të Hollywood-it, ndër ta Cate Blanchett, Viggo Mortensen, Chris Pine, Monica Bellucci dhe Gus Van Sant. Ai i inkurajoi artistët të vazhdojnë punën e tyre si “pilgrinë të imagjinatës”, duke përdorur artin për të sjellë shpresë dhe për të folur për probleme reale të shoqërisë
Takimi u mbajt në Sallën Klementine në Vatikan, ku Papa foli për fuqinë e filmit si mjet argëtimi, edukimi dhe reflektimi. Ai theksoi se filmi “ka kapacitetin për të mahnitur” dhe u kërkoi kineastëve të mos shmangin temat e vështira si dhuna, varfëria dhe luftërat e harruara. Sipas tij, “filmi i mirë nuk shfrytëzon dhimbjen, por e pranon dhe e eksploron atë”.
Në kontrast me stilin e drejtpërdrejtë të paraardhësit të tij, Papa Françeskut, Papa Leo XIV shihet nga shumë besimtarë si një figurë më e qetë dhe më reflektive. Në këtë takim ai shprehu shqetësimin për mbylljen e shumë kinemave, të cilat i quajti “zemra e komuniteteve”, duke bërë thirrje që ato të mbrohen si hapësira me vlerë të madhe sociale e kulturore.
Një moment i veçantë i takimit ishte dhurata e regjisorit Spike Lee: një fanellë e New York Knicks me emrin e Papa Leo-s dhe numrin 14. Pas ngjarjes, Cate Blanchett deklaroi se Papa i kishte frymëzuar artistët të kthehen në punët e tyre me më shumë motivim dhe përgjegjësi.
Takimi konsiderohet një sinjal i qartë i angazhimit të Papa Leo XIV për të forcuar urat mes Kishës Katolike dhe botës së artit, duke vendosur filmin si një mjet të rëndësishëm për të adresuar sfidat sociale dhe për të afruar brezat e rinj me mesazhet e shpresës dhe humanizmit.
