Një foto e fundit e Gonzalo Higuaín me një tifoz në një dyqan në Miami ka bërë xhiron e rrjetit dhe ka surprizuar shumë ndjekës të futbollit.
Ish-sulmuesi argjentinas, tashmë 38 vjeç, prej disa vitesh është larg vëmendjes së madhe mediatike, pas tërheqjes nga futbolli në vitin 2022. Megjithatë, emri i tij mbetet i lidhur fort me sportin, pasi aktualisht punon si Player Development Coach te Inter Miami, skuadra e David Beckham.
Higuaín është një nga sulmuesit që la gjurmë në futbollin europian. Ai nisi karrierën te River Plate, përpara se të transferohej te Real Madrid, ku u bë një nga sulmuesit më të rëndësishëm të skuadrës. Më pas, ai luajti edhe për klube të mëdha si Napoli, Juventus, Milan dhe Chelsea.
Fotoja e fundit e ish-futbollistit argjentinas ka tërhequr vëmendjen për shkak të pamjes së tij të ndryshuar. Edhe pse nuk është më aktiv në futbollin profesionist, Higuaín nuk është shkëputur plotësisht nga sporti. Ai luan rregullisht padel dhe madje në vitin 2024 fitoi një turne në Miami së bashku me venezuelianin Tarek Deham.
Gjatë karrierës së tij 17-vjeçare në nivelet më të larta, Higuaín shënoi mbi 300 gola. Vetëm me Real Madrid realizoi 107 gola në 190 ndeshje, ndërsa me kombëtaren e Argjentinës zhvilloi 75 takime. Ai gjithashtu fitoi Europa League me Chelsea, duke mbyllur një karrierë të pasur dhe të respektuar në futbollin botëror.
