Atalanta dhe Inter dhuruan një nga ndeshjet më spektakolare të sezonit në Serie A, duke u ndarë në barazim 4-4 pas një sfide plot përmbysje, gola dhe dramë deri në sekondat e fundit.
Interi e nisi në mënyrë perfekte dhe gjeti protagonistin te Pio Esposito. Sulmuesi realizoi dy gola brenda gjysmë ore, fillimisht pas një aksioni me Barellan dhe më pas me kokë pas një goditjeje këndi të ekzekutuar nga Dimarco.
Atalanta reagoi para pushimit me Elmas, ndërsa në fillim të pjesës së dytë Esposito kompletoi tripletën personale pas një asistimi të Thuram, duke çuar rezultatin në 3-1 për zikaltërit.
Megjithatë, vendasit nuk u dorëzuan. De Ketelaere ngushtoi diferencën në 3-2, por Interi u shkëput sërish pasi Sucic realizoi nga pika e bardhë për 4-2.
Kur gjithçka dukej e mbyllur, Atalanta nisi një reagim të jashtëzakonshëm. De Ketelaere shënoi sërish në dhjetë minutat e fundit, ndërsa në minutën e 91-të fitoi një penallti pas një prekjeje me dorë të Bastonit.
Kessié mori përgjegjësinë dhe nuk gaboi nga 11 metra, duke vulosur rezultatin 4-4.
Një barazim që i kushton shtrenjtë Interit në garën për kreun, ndërsa Atalanta shpërblehet për reagimin e jashtëzakonshëm në fund.











