Autoritetet italiane kanë finalizuar dje (17 dhjetor) një operacion kundër rrjetit të shpërndarjes dhe trafikut të lëndëve narkotike. Sipas mediave të huaja, gjatë këtij operacioni janë arrestuar tetë persona, përfshirë gjashtë shtetas shqiptarë. Gjykata e Astit ka vendosur masën e sigurisë “arrest me burg” për ta, duke i akuzuar për trafikim kokaine.
Organizata kryesisht vepronte në Granca, Cuneo dhe Asti. Hetuesit kanë mundur të gjurmojnë lëvizjet e grupit, rolet e të dyshuarve dhe operacionet financiare të tyre. Burimet italiane raportojnë se “kokat” e organizatës rekrutonin të rinj nga Shqipëria me kontrata 3-mujore, periudhë e cila është e lejueshme për të shkelur në zonën Shengen. Ndërkohë, grupit i sigurohej akomodimi, mjetet e transportit, ushqimi dhe një pagë e konsiderueshme mujore, që arrinte deri në 3 mijë euro.
Po ashtu, drejtuesit e grupit kujdeseshin për korrierët, duke i mbështetur edhe në rastet kur ata dëboheshin nga Italia ose riatdhesoheshin, duke i rikthyer përsëri në vend. Sipas hetuesve, një “djal” i pajisur me makinë, smartfon dhe telefona të koduar, komunikonte me klientët përmes WhatsApp-it. Ai shpërndante lëndën narkotike të paketuar në doza dhe e vendoste në vende të fshehura, për t’ua dorëzuar më pas klientëve.
