Inter dhe Milan kanë prezantuar pamjet e para të stadiumit të tyre të ri, një impiant modern me 71,500 vende që synon të zëvendësojë “Giuseppe Meazza” dhe të jetë gati për Euro 2032.
Stadiumi i ri do të quhet “Generali Stadium” dhe projekti është realizuar nga Foster+Partners dhe MANICA. Marrëveshja për emrin me kompaninë Generali pritet të ketë një vlerë rreth 650 milionë euro për 20 vite.
Dizajni parashikon një stadium oval, modern dhe teknologjik, me një fasadë të formuar nga struktura trekëndore dhe me mundësi ndriçimi të personalizuar përmes LED-ve.
Ndryshe nga San Siro aktual, stadiumi i ri do të ketë dy nivele tribunash. Pjerrësia do të arrijë deri në 37 gradë, duke ruajtur ndjesinë karakteristike të tribunave të larta dhe shumë pranë fushës.
Kompleksi do të përfshijë zona VIP, restorante, pika ushqimi, muze të Interit dhe Milanit, hapësira tregtare, hotel dhe zyra. Një pjesë e vendeve Premium do të ofrojë edhe pamje nga tuneli ku futbollistët kalojnë për të hyrë në fushë.
Teknologjia do të jetë një tjetër element kryesor. Katër ekrane gjigante do të vendosen në çati, ndërsa mes dy niveleve të tribunave do të ketë një unazë LED që do të shfaqë pamje nga ndeshja, statistika dhe reklama.
Rreth 100 milionë euro parashikohet të investohen vetëm për izolimin akustik, me synimin që zhurma e stadiumit të ketë sa më pak ndikim te banorët e zonës përreth.
Generali Stadium do të jetë pjesë e një projekti më të madh urban prej rreth 281 mijë metrash katrorë, me hapësira publike, zona të gjelbra dhe ambiente argëtimi.
Objektivi i Interit dhe Milanit është që stadiumi të jetë funksional në vitin 2031 dhe të jetë mes impianteve italiane që do të presin ndeshjet e Euro 2032.
Pas hapjes së stadiumit të ri, pjesa më e madhe e San Siros aktual pritet të shembet. Megjithatë, një pjesë e tribunës dhe kullës jugperëndimore pritet të ruhet si kujtim i stadiumit historik.
