Gianluca Prestianni ka reaguar me një deklaratë pas incidentit të bujshëm me Vinícius Jr., duke këmbëngulur se ylli i Real Madridit e ka keqkuptuar.
Sot, në një “story” në Instagram, anësori argjentinas 20-vjeçar i Benficës së Lisbonës deklaroi se nuk ka përdorur fyerje raciste ndaj Vinícius gjatë ndeshjes së djeshme, e cila u shoqërua me polemika.
Sipas Prestiannit, lojtari i Real Madridit i interpretoi gabim fjalët e tij, gjë që solli reagim të tepruar si nga vetë Vinícius, ashtu edhe nga shokët e skuadrës.
“Dua të sqaroj se në asnjë rrethanë nuk kam bërtitur fyerje raciste ndaj Vinícius Júnior, i cili fatkeqësisht e keqkuptoi atë që mendoi se dëgjoi. Nuk kam qenë kurrë racist me askënd dhe më vjen keq për kërcënimet që kam marrë nga lojtarë të Real Madridit”, shkroi Prestianni në “story”-n e tij.
Aktualisht, tabloja e plotë e asaj që ndodhi mbetet e paqartë, pasi të dyja palët po këmbëngulin te versioni i tyre.
