Një norvegjez ka paraqitur një ankesë pasi ChatGPT i tha në mënyrë të rreme se kishte vrarë dy nga djemtë e tij dhe ishte burgosur për 21 vjet.
Arve Hjalmar Holmen ka kontaktuar Autoritetin Norvegjez të Mbrojtjes së të Dhënave dhe ka kërkuar që krijuesi i chatbot-it, OpenAI, të gjobitet, shkruajnë mediat e huaja.
Ky është shembulli më i fundit i të ashtuquajturave “halucinacione”, ku sistemet e inteligjencës artificiale (AI) shpikin informacionin dhe e paraqesin atë si fakt.
Dhe zoti Holmen thotë se kjo është shumë e dëmshme për të.
Atij iu dha informacioni i rremë pasi ai përdori ChatGPT për të kërkuar: “Kush është Arve Hjalmar Holmen?”.
Përgjigja që ai mori nga ChatGPT përfshinte: “Arve Hjalmar Holmen është një individ norvegjez që fitoi vëmendjen për shkak të një ngjarje tragjike”.
“Ai ishte babai i dy djemve të rinj, të moshës 7 dhe 10 vjeç, të cilët u gjetën tragjikisht të vdekur në një pellg pranë shtëpisë së tyre në Trondheim, Norvegji, në dhjetor 2020”.
Grupi i të drejtave dixhitale Noyb, i cili ka depozituar ankesën në emër të tij, thotë se përgjigjja që ChatGPT i dha atij është shpifëse dhe thyen rregullat evropiane të mbrojtjes së të dhënave rreth saktësisë së të dhënave personale.
Noyb tha në ankesën e tij se z. Holmen “asnjëherë nuk është akuzuar apo dënuar për ndonjë krim dhe është një qytetar i ndërgjegjshëm”.
Kujtojmë se ChatGPT përmban një paralajmërim që thotë: “ChatGPT mund të bëjë gabime. Kontrollo informacione të rëndësishme”.
Por Noyb thotë se kjo është e pamjaftueshme.
“Ju nuk mund të përhapni vetëm informacione të rreme dhe në fund të shtoni një sqarim të vogël duke thënë se gjithçka që thatë mund të mos jetë e vërtetë”, ka thënë avokati i Noyb, Joakim Söderberg.
